Nellie van der Merwe, gebore Petronella Jacoba van Aarde, is vyftig en het haar lewe lank probeer voldoen aan wat ander van 'n ordentlike Afrikaanse vrou verwag. Sy het geleer om stil te bly, aan te pas en haar plek binne haar huwelik, familie, werk, kerk en gemeenskap te aanvaar. Ná 'n histerektomie kantel haar netjies geordende wêreld en begin sy vra wie sy werklik is wanneer al die rolle en verwagtinge weggestroop word. Nellie kyk nuut na die mense rondom haar, maar ook na haar eie aandeel in die reëls wat haar vasgehou het. Met skerp waarneming en humor ondersoek die roman identiteit, vrouwees, middeljare, verlies en die moed om uiteindelik jou eie stem terug te neem.